Suðurstrandarvegur opnast um helgina

Nýi Suðurstrandarvegurinn klárast á morgun og opnast þá ný tenging milli Suðurlands og Suðurnesja. Loksins, loksins, myndi margur segja, en nú er verið að leggja síðustu metrana af malbikinu á veginn.

Honum var fyrst lofað fyrir 12 árum í tengslum við kjördæmabreytingu þegar ákveðið var að Suðurlands- og hluta Reykjaness- og Austurlandskjördæmis yrði steypt í Suðurkjördæmi. Vegurinn, sem kallaður hefur verið margsviknasta kosningaloforðið, er að fá slitlagið á síðustu kaflana, í dag á verkhluta Suðurverks milli Krýsuvíkur og Grindavíkur, og á morgun á síðasta verkhluta KNH-verktaka, sem er tenging frá Krýsuvík inn á Suðurstrandarveginn.

Suðurverk átti raunar ekki að klára sinn hluta fyrr en í september næsta haust. Dofri Eysteinsson, forstjóri Suðurverks, segir að félagið hafi haft tæki og búnað til að vinna verkið á skemmri tíma, og mannskap sem ekki hafi haft önnur verkefni. Þetta séu þáttaskil hjá fyrirtækinu. Nú hafi það engan verksamning fyrir mannskapinn né tækin. Það sé ljótt dæmi að engin verkefni skuli heldur vera í pípunum, segir Dofri.

Með opnun vegarins verða hins vegar tímamót í samgöngum milli Suðurnesja og Suðurlands og einkum fyrir íbúa Þorlákshafnar og Grindavíkur, sem fá nú rennisléttan 58 kílómetra langan nútímaveg á milli bæjanna. Bryndís Gunnlaugsdóttir, forseti bæjarstjórnar Grindavíkur, segir verklokin tíu mánuðum á undan áætlun og Grindvíkingar fagni gífurlega. Loksins sé vegurinn kominn sem barist hafi verið fyrir í fjölda ára, enda hafi því verið lofað við kjördæmabreytinguna að tengja kjördæmin saman.

Grindvíkingar vonast eftir stóraukinni umferð ferðamanna. Nú geti menn ekið beint úr Grindavík til Suðurlands og sloppið við að fara í gegnum höfuðborgina. Vegurinn muni einnig hafa mikil áhrif á flutninga, það séu til dæmis miklir fiskflutningar, eins og frá Djúpavogi til Grindavíkur, og alla leið á Keflavíkurflugvöll, og flutningabílarnir vilji sleppa við að fara í gegnum Reykjavík.

Verktakarnir ætla báðir að gera sitt svo unnt sé að opna allan veginn um helgina. Pétur Kristjánsson, verkstjóri hjá KNH, segir að nú sé verið að klára og á morgun verði þetta búið.

Bæjarstjórn Grindavíkur ætlar strax í fyrramálið að aka öll til Þorlákshafnar. Dofri Eysteinsson óskar sveitarfélögunum og raunar öllum landsmönnum til hamingju og vonar að vegurinn eigi eftir að verða öllum til góðs.