Helgi Hjörvar: Ráðning Páls er hneyksli

„Ráðning forstjóra Bankasýslu ríkisins er hneyksli,“ sagði Helgi Hjörvar, þingmaður Samfylkingarinnar á Alþingi í morgun. Hann sagði að með ráðningu Páls Magnússonar í starfið hefði verið ráðinn maður sem hefði hvorki menntun né starfsreynslu af fjármálamörkuðum.

„Með þessu sviptir bankasýslan sig því trausti og þeim trúverðugleika sem hún verður að njóta þar sem hún fer með eignahlut íslendinga í viðskiptabönkunum og það vandasama verkefni að selja hluta þeirra einkaaðilum,“ sagði Helgi.

Hann tók fram að Íslendingar ættu kröfu á því að við ráðningu í æðstu embætti ríkisins væri ráðið að lögmæltri sérþekkingu á viðkomandi sviði en ekki af hentisjónarmiðum. „Þar verða allir að sitja við sama borð, stjórnmálastéttin líka.“