Neuer: Ég verð áfram í Þýskalandi

Einn heitasti bitinn á markaðnum, Manuel Neuer, segir við þýska fjölmiðla í dag að hann sé ekki á leiðinni frá Þýskalandi og mun að öllum líkindum leika í þýsku deildinni á næstu leiktíð.

Þessi frábæri markvörður Shalke hefur verið bendlaður við öll stærstu liðin í Evrópu undanfarna mánuði en eftir magnaða frammistöðu markmannsins gegn Manchester United í meistaradeild Evrópu síðastliðin þriðjudag þá urðu þær raddir enn háværari.

„Markmiðið hjá mér er að leika með liði hér í landi,“ sagði Neuer eftir tapið gegn FC Bayern í gær, en það lið þykir líklegasti áfangastaður markmannsins.

Íþróttastjóri Shalke tjáði sig einnig um málið eftir leikinn í gær, en hann hefur ekkert heyrt frá liðum frá Englandi.

„Ég er búin að lesa mikið af fréttum um það að Neuer sé á leiðinni til Englands, en það eina sem ég get sagt um það mál er að Manchester United hefur ekki haft samband við okkur“.