Stjórnarmaður segir að Ragnar fari úr Framtakssjóðnum

„Það er minn skilningur að hann hafi ætlað að hætta í báðum stjórnunum," segir Ásta Rut Jónasdóttir, stjórnarmaður í VR og Lífeyrissjóði verslunarmanna, um stöðu Ragnars Önundarsonar.

Ragnar tilkynnti stjórn Lífeyrissjóðs verslunarmanna í dag að hann hyggðist segja sig úr stjórn lífeyrissjóðsins. Hann sagði svo í samtali við fréttastofu síðar í dag að framtíð hans hjá Framtakssjóði Íslands, þar sem hann situr í stjórn í umboði stjórnar LV, væri háð vilja annarra í stjórn LV.

Ragnar var framkvæmdarstjóri Kreditkorta hf., árið 2005, þegar samkeppniseftirlitið hóf rannsókn á ólögmætu samráði fryritækisins, Greiðslumiðlunar og Fjölgreiðslumiðlunar gegn nýjum keppinauti á markaðnum. Rannsókninni lauk með sátt í ársbyrjun 2008, gegn 735 milljóna króna stjórnvaldssekt fyrirtækjanna þriggja. Í Kastljósi gærkvöldsins voru birt ný gögn í málinu, meðal annars tölvupóstssamskipti Ragnars og fleiri aðila.

Vísir hafði samband við Ágúst Einarsson, stjórnarformann Framtakssjóðs Íslands, í dag. Hann sagði að þar sem Ragnar sæti í umboði stjórnar Lífeyrissjóðs verslunarmanna væri það ekki hans að tjá sig um stöðu Ragnars.

Ásta Rut er eini stjórnarmaðurinn í Lífeyrissjóði verslunarmanna sem jafnframt á sæti í stjórn VR. Fréttavefur DV vísar í tölvupóst hennar til stjórnar VR í dag, eftir fund í stjórn lífeyrissjóðsins. Þar segir hún að stjórnarfundurinn hafi verið með hefðbundnu sniði.