Skæðir fallvindar vel þekktir á leitarsvæðinu

„Fallvindar sem þessir eru vel þekktir meðfram allri austurströnd Grænlands, aðallega að vetrinum en vægari gerðin þekkist einnig að sumarlagi," segir Einar Sveinbjörnsson, veðurfræðingur. 14 kajakræðara er saknað við austurströnd Grænlands og nú siglir danska eftirlitsskipið Ejnar Mikkelsen hraðbyri í átt að Scoresbysundi.

Einar fjallar um málið á bloggsíðu sinni og segir að ekki hafi verið neitt í veðurkortunum sem benti til óveðurs á svæðinu í gær. Ræðararnir sem eru breskir og þýskir voru í Rauðafirði í Scoresbysundi þegar óveðrið skall á. „Á fallegum sumardögum er þarna alger kyrrð eins og vænta má og umhverfið gríðarlega stórbrotið með um 3000 metra hátt jökulhvel Grænlands á aðra hönd og sólbakað klappirnar á hina," segir Einar.

Talið er að allt að 26 ræðarar hafi verið í Scoresbysundi þegar óveðrið skall á í gær. Grænlenskir veiðimenn björguðu sex þeirra og þá tókst sex öðrum að láta vita af sér. Þeim sem tókst að bjarga voru fluttir til Reykjavíkur til aðhlynningar.

Að mati Einars er að öllum líkindum um að ræða skæðan fallvind sem á grænlensku kallast piteraq. „Þá hvolfist kalt loft ofan af jökli niður snarbrattar hlíðarnar og staðbundið getur vindur náð mjög miklum styrk."

Einar segir ekki auðvelt sjá hvort að dæmigerð skilyrði fyrir piteraq-vind hafi verið á þessum slóðum í byrjun vikunnar. Hægt er að lesa nánar um piteraq á bloggsíðu Einars.