Jessica Simpson opnaði sig fyrir Opruh

Leikkonan og söngkonan Jessica Simpson var aðeins 23 ára þegar hún birtist í raunveruleikaþættinum Newlyweds ásamt þáverandi eiginmanni sínum, Nick Lachey. Jessica varð brátt fræg fyrir „ljóskulegar" athugasemdir sínar í þættinum eins og þegar hún ruglaðist á kalkún og kjúklingi. Hún vonast til þess að vera vaxin upp úr þessum barnaskap sínum núna þegar hún er 29 ára. Hún er núna að undirbúa nýjan þátt sem á að heita The Price of Beauty, og var vonsvikin þegar hún gerði sér grein fyrir að hún ætti það enþá til að vera „ljóska".

„Ég bara get ekki losnað við þetta" sagði hún hlægjandi. Þrátt fyrir þetta er Jessica virkilega stolt af því sem hún hefur gert í lífinu. Þó að hún hafi gengið í gegnum mörg sambönd sem hafa mistekist og hefur þurft að þola mikla gagnrýni vegna þyngdar sinnar hefur hún ávallt haldið áfram og verið trú sjálfri sér.

„Ef ég er ekki ég sjálf þá er ég ekki ánægð. Það var mjög mikilvægt fyrir mig að sýna fólki hvar ég stend í lífinu." sagði hún við bandaríska tímaritið USA today. Jessica kom nýlega fram í The Oprah Winfrey Show til þess að tala um líkamsímynd sína og viðbrögð hennar við viðtali sem var tekið við fyrrverandi kærasta hennar, John Mayer, þar sem hann lýsir því hvernig Jessica var í svefnherberginu.

Jessica var nær gráti mörgum sinnum í þættinum og segir að það hafi verið frábært að opna sig um tilfinningar sínar. „Þetta var eins og sálfræðimeðferð fyrir framan allan heiminn með besta sálfræðingnum," sagði hún. „Þetta voru hlutir sem ég hafði hugsað en ekki sagt," bætti hún við að lokum.