Unglingar og rómverjar

Unnendur skylmingamynda halda áfram að fá dýrindis máltíðir framreiddar á kvikmyndahlaðborðið því stórmyndin Centurion verður frumsýnd um helgina.

Myndin gerist á Bretlandi um það leyti sem rómverska heimsveldið er að leggja landið undir sig. Herdeild undir stjórn Quintus Dias lendir í óvæntri mótspyrnu þegar hópur Pikta, þjóðflokks sem býr í Skotlandi, verst með kjafti og klóm gegn hernámi Rómverja. Þegar sonur leiðtoga Pikta er drepinn neyðast Rómverjarnir til að leggja á flótta enda eru Piktar þekktir fyrir sannkallaða villimennsku í stríði.

Með helstu hlutverk í myndinni fara þau Michael Fassbender, Dominic West og Bond-pían Olga Kurylenko.

Þeir sem kjósa aðeins rólegri stemningu gætu kíkt á nýjustu mynd Michaels Cera. Þrátt fyrir að leikarinn Cera verði 22 ára 7. júní næstkomandi virðist hann helst næla sér í sextán ára gelgjuhlutverk. Youth in Revolt er engin breyting á því. Cera virðist fallinn í sömu gildru og Michael J. Fox, hann er alltaf ungur.

Cera leikur Nick Twisp sem á í vandræðum með sjálfan sig en þegar hann kynnist draumadísinni ákveður hann að skapa Francois Dillinger, hið illa sjálf. Meðal annarra leikara í myndinni má nefna Ray Liotta og Justin Long.

Hér er sýnishorn fyrir Youth in Revolt.