Jón Ásgeir: „Veiðiferð“ slitastjórnar kostaði stefndu 4-500 milljónir

Jón Ásgeir Jóhannesson fullyrðir að málarekstur slitastjórnar Glitnis á hendur honum og viðskiptafélögum hans í New York hafi kostað hina stefndu í málinu fjögur til fimm hundruð milljónir króna. Hann hyggst fara í skaðabótamál við slitastjórnina.

Slitastjórn Glitnis hóf málaferli fyrir dómstóli í New York í maí síðastliðnum gegn Jóni Ásgeiri, Þorsteini M. Jónssyni, Jóni Sigurðssyni, Lárusi Welding, Pálma Haraldssyni, Hannesi Smárasyni, Ingibjörgu Pálmadóttur og endurskoðunarfyrirtækinu PwC og krafðist 250 milljarða króna í skaðabætur. Dómari í málinu vísaði því frá í gær á þeirri forsendu að New York væri ekki rétt varnarþing, málið ætti heima á Íslandi.

Jón Ásgeir Jóhannesson, einn hinna stefndu í málinu, segir að niðurstaðan hafi ekki komið sér á óvart, enda hafi hin stefndu alltaf haldið því fram að málið ætti ekki heima í Bandaríkjunum. Þá segir hann að það verði erfitt fyrir slitastjórnina að höfða málið á Íslandi núna.

Geta ekki notað íslenska dómstóla sem „eitthvað varadekk"

„Ég held að það séu engar líkur á að slítastjórninni detti í hug að fara með málið til Íslands því hún er nýbúin að lýsa því yfir með greinargerðum að íslenskir dómstólar séu ekki hæfir til að fara með málið. Ég held að slitastjórnin geti ekki ætlast til þess að hún geti notað íslenska dómstóla sem eitthvað varadekk," segir Jón Ásgeir.

Jón Ásgeir segist ekki hafa fengið upplýsingar um að nýtt mál verði höfðað, en fulltrúar slitastjórnarinnar hafa gefið í skyn að frávísun málsins í New York þýði ekki endalok þess og mál verði rekið hér heima á Íslandi. „Við höfum enga hugmynd um það. Málinu var hent út og það er fullnaðarsigur fyrir okkur," segir Jón Ásegir. Hann segir að málareksturinn hafi valdið miklu tjóni. „Menn þurfa ekki annað en að glugga í umfjöllun fjölmiðla til að sjá að tjónið er mikið. Menn hafa misst störf sín og fyrirtæki út af þessari stefnu."

Jón Ásgeir segir ljóst að kostnaðurinn vegna þessara málaferla sé mikill. „Ég held að þessi veiðiferð til New York hafi kostað slitastjórnina um þrjá milljarða, en þetta hefur kostað þau sem var stefnt fjögur til fimm hundruð milljónir króna."

Jón Ásgeir segist ekki geta talað fyrir hönd annarra en sjálfs sín en segist ætla að sækja bætur vegna þessara málshöfðunar í New York. „Maður hlýtur að sækja þær bætur vegna þess tjóns sem maður hefur orðið fyrir. Það hlýtur að liggja í augum uppi."