Breytti landslagi breskra stjórnmála

„Mér kemur ekkert á óvart,“ sagði Gordon Brown, forsætisráðherra Breta, þegar hann var spurður hvort „fyrirbærið“ Nick Clegg komi honum á óvart.

Clegg er leiðtogi Frjálslynda demókrataflokksins, „þriðja“ flokksins í breskum stjórnmálum, sem allt frá stofnun fyrir rúmum tveimur áratugum hefur mátt sætta sig við töluvert minna fylgi en Verkamannaflokkurinn og Íhaldsflokkurinn.

Íhaldsflokkurinn, undir forystu Davids Cameron, hefur mælst með yfirburðafylgi síðustu mánuði en Verkamannaflokkurinn, sem hefur verið við völd síðan Tony Blair sigraði John Major, þáverandi leiðtoga Íhaldsflokksins, árið 1997, hefur verið í djúpri lægð undir forystu Gordons Brown.

Frammistaða Cleggs í fyrstu sjónvarpskappræðum flokksleiðtoganna í síðustu viku breytti þessu með afgerandi hætti, því nú mælast þessir þrír flokkar með álíka mikið fylgi, tæplega þriðjung hver. Haldist þetta mun enginn flokkur fá hreinan meirihluta í þingkosningunum 6. maí, sem væri harla óvenjulegt því áratugum saman hafa annaðhvort íhaldsmenn eða Verkamannaflokkurinn verið nokkuð öruggir með meirihlutastjórn síns flokks.

Brown hefur reyndar lagt til að þeir Clegg taki höndum saman og myndi samsteypustjórn til þess að halda íhaldsmönnum frá völdum, en Clegg segir það ekki sýna annað en örvæntingu forsætisráðherrans. Nick Clegg hefur verið formaður Frjálslyndra demókrata frá 2007, og hafði þá setið á breska þinginu í tvö ár en þar áður á Evrópuþinginu í fimm ár. Hann er 43 ára, fæddur í Bretlandi en er af hollenskum og rússneskum ættum. Móðir hans er hollensk en faðir hans hálfrússneskur bankamaður, býsna vel stæður. Eiginkona hans er spænsk, þannig að óhætt er að segja að Clegg hafi góð tengsl víða í Evrópu.

Í breskum fjölmiðlum hafa verið rifjaðar upp sögur af skólagöngu hans í fínum einkaskólum, þar sem hann átti erfitt með að vakna á morgnana og lét aðra nemendur snúast í kringum sig.

Vandræðalegt þótti þegar dagblaðið Sun komst yfir minnisblöð sem hann hafði með sér fyrir kappræðurnar í síðustu viku, þar sem fram kom að ráðgjafar hans hvöttu hann meðal annars til þess að líkja frekar eftir orðfæri Davids Cameron en forðast að tala eins og Gordon Brown.

gudsteinn@frettabladid.is