Rætt um að loka fyrir alla umferð

„Um 20 þúsund manns koma að skoða bjargið á hverju sumri og það er einfaldlega ekki hægt að bjóða fólki upp á svona aðstöðu," segir Ragnar Jörundsson, bæjarstjóri Vesturbyggðar. Hafnar eru umræður um endurbætur á merkingum og aðstöðu ferðafólks við Látrabjarg eftir að ferðamaður hrapaði þar til bana í vikunni.

Ragnar segir málið flókið vegna þess hve margir eigendur eru að landinu, Umhverfisstofnun þar á meðal. Hann bendir á að aðvörunar­skiltum og öðrum varúðarráðstöfunum sé sárlega ábótavant og bráðnauðsynlegt sé að gera eitthvað í málinu. Málið sé hins vegar flókið vegna þess hve eigendur að landinu séu margir.

Þorvaldur Búason, fyrrverandi formaður Félags landeigenda í Bjargtungum, er alveg á móti umferð ferðamanna við Látrabjarg sökum gífurlegrar slysahættu. „Það verður aldrei komið í veg fyrir öll slys," segir Þorvaldur.

„Og ég hef ekki séð neinar tillögur um úrbætur sem breyta því að þau verði."

Síðasta slys sem vitað er um í Látrabjargi varð 17. júní 1926, þegar tveir drengir hröpuðu til bana við eggjatínslu.