Detox: Kvartað til Landlæknis

Á annan tug kvartanna hafa borist til Landlæknisembættisins vegna detox-meðferða. Von er á skýrslu frá embættinu vegna þessa síðar í mánuðinum.

Í Morgunblaðinu síðastliðinn laugardag lýsti Jónína Benediktsdóttir, sem býður upp á meðferðina, að aðferðin sparaði ríkinu hundruð milljóna á ári. Landlæknisembættið telur að þær fullyrðingar standist ekki skoðun.

Vissulega sé margt jákvætt tengt meðferðinni, svo sem áhersla á hreyfingu og heilnæmt mataræði. Hins vegar liggi engin gögn fyrir sem sýni að ristilskolun, sem er hluti meðferðarinnar, geri nokkuð gagn. Slíkar skolanir geti hins vegar haft skaðleg áhrif.