Grunaður morðingi í gæsluvarðhald

Rúmlega fertugur Íslendingur sem grunaður er um að hafa stungið annan íslending til bana í Kaupmannahöfn í gær, hringdi sjálfur á neyðarlínuna eftir verknaðinn. Hinn grunaði hefur verið úrskurðaður í gæsluvarðhald til 31. mars. Nágranni mannsins segir hurðinni á íbúð mannsins hafa verið sparkað upp í gærkvöldi.

Maðurinn er grunaður um að hafa stungið félaga sinn í hálsinn með hnífi eftir að upp úr sauð á heimili þess látna. Morðið var framið rétt fyrir miðnætti í gærkvöldi í hluta Kaupmannahafnar sem heitir Valby. Árásarmaðurinn hringdi sjálfur í neyðarlínuna eftir verknaðinn. Ekki var hægt að yfirheyra hann í nótt þar sem hann var í nokkuð annarlegu ástandi.

Poul Hansen rannsóknarlögreglumaður fer með rannsókn málsins.

Poul segir mennina tvo áður hafa komið við sögu lögreglu fyrir minniháttar afbrot.

Nágranni mannsins sagðist í samtali við fréttastofu í dag hafa heyrt nokkur læti rétt fyrir miðnætti í gær. Þá hefði verið eins og einhver hefði sparkað upp hurðinni og einhver átök hafist.

Nágranninn sagði íslendinginn hafa búið í húsinu í þau tvö ár sem hann hefði búið þar. Hverfið væri rólegt og friðsælt, en nokkuð ónæði hefði verið af íslendingnum sem bjó einn í íbúð sinni. Hann hefði þó verið með sambýliskonu fyrir nokkrum mánuðum og á ýmsu hefði gengið í sambúð þeirra.