Fangar hjálpa fátækum: Baka mörg þúsund smákökur

„Margir hérna koma frá brotnum heimilum og fjölskyldum sem hafa haft lítið á milli handanna þannig að það eru margir hérna sem þekkja þetta. Okkur fannst við þurfa að gera eitthvað en það er ekki mikið sem við getum gert verandi í öryggisfangelsi," segir fanginn Jónas Árni Lúðvíksson í samtali við fréttastofu.

Fangar á Litla Hrauni afhenda á morgun Mæðrastyrksnefnd Reykjavíkur og Jólaaðstoð-2010 mörg þúsund smákökur sem þeir hafa bakað til að hjálpa fjölskyldum sem minnst peningaráð hafa fyrir jólin. „Með öllu baka þeir úr hálfu tonni og nú þegar er búið að baka stærstan hluta af því," segir Margrét Frímannsdóttir, forstöðumaður fangelsisins á Litla Hrauni. „Það hefur verið einstakt að fylgjast með þeim."

Fangar kvíða og vanlíðanar

Jónas segir að fangarnir vilji láta gott af sér leiða. „Ástandið í þjóðfélaginu er alltaf að versna og versna og þó fólkið í röðunum sé frjálst ferða sinna er það hálfpartin fangar kvíða og vanlíðanar og líður eflust verr en okkur hér. Þannig að okkur langaði til að gera eitthvað og fórum með þessa hugmynd til Margrétar," segir Jónas. „Það komust færri að en vildu en við erum sjö í þessu. Eldhúsið bíður bara ekki upp á að fleiri taki þátt."

Í framhaldinu höfðu fangarnir samband við fjölda fyrirtækja og athuguðu hvort að þau væru til í að leggja þeim til hráefni. Jónas segir auk þess að bakarinn Jói Fel hafi verið þeim innan handar og gefið þeim góðar ábendingar. Jói hafi þó ekki náð að kíkja til þeirra.

Baka sex sortir

Smákökugerðin fer fram í eldhúsi fangelsisins eftir hádegismat á hverjum degi undir leiðsögn matráðskonunnar. „Hún hefur verið frábær og hún veit nákvæmlega hvernig á að gera þetta," segir Jónas. „Þrátt fyrir að við viljum glaðir vera þarna allan daginn þá verður alltaf einhver að vera með okkur og hér er auðvitað mannekla eins og víða annars staðar."

Jónas og félagar hafa bakað sex sortir og pakkað kökunum inn í smápoka og lokað þeim með jólabandi. „Það er sveitalúkk á þessu en þetta eru heimilslegar og góðar smákökur."

Stærstur hluti verður afhentur á morgun en Jónas segir að fangarnir muni halda áfram að baka næstu daga.

Ísland í dag fjallaði einnig um málið í síðustu viku og horfa má á þá umfjöllun hér að ofan.