Útilokar ekki stjórnmálaslit

„Við íhugum það mjög rækilega en hröpum ekki að neinum slíkum ákvörðunum. Við gerum það að vandlega yfirförnu máli vegna þess að við viljum tala til Ísraela á eins áhrifaríkan hátt og við mögulega getum," segir Ögmundur Jónsson, þingmaður VG, aðspurður hvort hann vilji að Ísland slíti stjórnmálasambandi við Ísrael. Hann segir að stjórnmálaslit séu ekki takmark heldur tæki til að koma ákveðnum skilaboðum á framfæri.

Utanríkismálanefnd Alþingis fundar í hádeginu um árásir Ísraela á skipalest á leið til Gaza með hjálpargögn þar sem fjöldi manna voru drepnir og fjölmargir særðir. Síðar í dag fer fram utandagskrárumræða um málið á Alþingi.

Góður fundur

Utanríkismálanefnd Alþingis fundaði í gærkvöldi um árásina að beiðni Birgittu Jónsdóttur, þingmanns Hreyfingarinnar, en þingmenn Hreyfingarinnar vilja slíta stjórnmálasambandi við Ísrael. Sveinn Rúnar Hauksson, formaður félagsins Ísland-Palestína, kom á fundinn og þá sat Össur Skarphéðinsson, utanríkisráðherra, einnig fundinn. Össur hefur fordæmt árásina og sagt hana vera svívirðilega.

Ögmundur segir að fundurinn hafi verið góður. Hann vonast til þess að nefndin komist að sameiginlegri niðurstöðu á eftir. Fordæmi sé fyrir því að utanríkismálanefnd þingsins tali einni röddu í málefnum Ísraels og Palestínu.

Ekki takmark heldur tæki

„Stjórnmálaslit eru ekki takmark í sjálfu sér heldur tæki til að ná fram tilteknum áhrifum. Ef við getum gert það með einhverjum öðrum hætti þá hljótum við að skoða það," segir Ögmundur. „Það er mikill samhljómur um að fordæma þessar árásir og grípa til einhverra þeirra aðgerða sem á táknrænan hátt lýsa afstöðu þjóðarinnar. Með nákvæmlega hvaða hætti við gerum það er viðfangsefni fundarins." Utanríkisráðherra mun sitja fund utanríkismálanefndar í hádeginu.

Heilli þjóð haldið í fangabúðum

Ögmundur bendir á að Ísraelar hafi vanvirt samþykktir Sameinuðu þjóðanna í næstum hálfa öld. Hann telur að tíminn sé til kominn að þeir fari að alþjóðalögum.

„Þarna er verið að fremja svívirðileg mannréttindabrot þar sem heilli þjóð er haldið í fangabúðum," segir Ögmundur. „Það er skelfilegt þegar reynt er að koma hjálpargögnum í friðsamlegri skipalest til fólksins og það skuli torveldað með vopnaðri íhlutun."