Agent Fresco tekur upp fimmtán laga konseptplötu

„Ég er virkilega spenntur fyrir plötunni og er ánægður með útkomuna eins og þetta lítur út núna,“ segir Arnór Dan Arnarson, söngvari Agent Fresco.

Hljómsveitin er byrjuð að taka upp fyrstu breiðskífu sína í hljóðverinu Orgelsmiðjunni. Upptökurnar áttu að hefjast formlega í ágúst en þeim hefur verið flýtt lítillega. „Þetta kostar ógeðslega mikinn næturtíma en þetta verður vel þess virði,“ segir Arnór Dan. Fimmtán lög verða á plötunni þar sem ákveðin heildarmynd verður í gangi. Slíkar plötur kallast konseptplötur á ensku, en Sgt. Pepper’s Lonely Hearts Club Band með Bítlunum og Animals með Pink Floyd eru á meðal þekktari plötum í þeim flokki. „Lögin tengjast pínulítið en aðallega textarnir,“ segir söngvarinn.

Agent Fresco hefur verið ein mest spennandi hljómsveit landsins frá því að hún vann Músiktilraunir árið 2008. Hljómsveitin var sigursæl það ár og vann einnig íslensku undankeppnina fyrir alþjóðlegu hljómsveitakeppnina Global Battle of the Bands.

Enn á eftir að ráða nýjan bassaleikara í Agent Fresco. Eins og Fréttablaðið greindi frá í síðasta mánuði hætti Borgþór Jónsson, einn af stofnendum sveitarinnar. Vignir úr Ultra Mega Technobandinu Stefáni og Helgi Eyjólfsson úr Fjallabræðrum koma til greina í hans stað og hafa þeir eitthvað spilað með sveitinni að undanförnu. Í hljóðverinu hefur gítarleikarinn Þórarinn Guðnason séð um að taka upp flesta grunnbassana en ef sveitin þarf á kontrabassaleikara að halda eru aðrir kallaðir til leiks.

Nýja platan er væntanleg í búðir í október eða nóvember og bíða íslenskir rokkunnendur óþreyjufullir eftir henni. Tvö ár eru liðin síðan EP-plata sveitarinnar, Lightbulb Universe, kom út.

freyr@frettabladid.is