Allegri: Cassano sá eini sem kemur í janúar

„Við þurfum ekki neinn annan," segir Massimiliano Allegri, þjálfari AC Milan, en liðið fær vandræðagemlinginn Antonio Cassano í janúar frá Sampdoria.

„Ég hlakka til að þjálfa Cassano. Hann er frábær leikmaður og frábærir leikmenn eru fljótir að aðlagast nýju liði. Við munum halda áfram að spila sama kerfi. Cassano er fjölhæfur en verður notaður mest í fremstu víglínu fyrst Pippo Inzaghi er meiddur," segir Allegri.

Cassano verður eini leikmaðurinn sem Milan ætlar að fá í janúar en félagið ætlar að halda Ronaldinho hjá sér út tímabilið. „Andinn í leikmannahópnum er frábær og ég vil ekki fórna honum með því að fá of marga til liðsins," segir Allegri.