Ótrúleg sigurganga hjá Connecticut - 89 sigurleikir í röð

Kvennalið Connecticut háskólans í körfubolta setti nýtt met í hópíþróttum á þriðjudaginn þegar liðið sigraði Florida State 93-63 í NCAA háskóladeildinni. „UConn Huskies" eins og liðið er kallað vestanhafs hefur nú unnið 89 deildarleiki í röð og bætti met karlaliðs UCLA sem vann 88 leiki í röð á árunum 1971-1974.

Connecticut hefur sjö sinnum sigrað í NCAA deildinni (1995, 2000, 2002, 2003, 2004, 2009, 2010) og alls hefur liðið komist 11 sinnum í undanúrslit eða Final Four. Síðasti tapleikur liðsins var árið 2008 í undanúrslitum gegn Stanford.

Geno Auriemma hefur þjálfað liðið frá árinu 1985 og undir hans stjórn hefur liðið unnið 745 leiki en tapað aðeins 122 en það gerir um 86% vinningshlutfall.