Hlín Einars: „Þetta var rosalegt sjokk“

„Þetta var ekki alveg leiðin sem ég ætlaði að nota til að kynna vefinn, en þeir sem vissu ekki hvað bleikt.is var í gær þeir vita það í dag," segir Hlín Einardóttir, ritstjóri vefritsins bleikt.is, sem fór úr axlarlið í hljóðveri Bylgjunnar í gær þar sem hún ætlaði að kynna vefinn í þættinum Í bítið.

Fjallað var um atvikið á öllum helstu fréttamiðlum landsins og því óhætt að segja að óhapp Hlínar hafi orðið til þess að enn fleiri en ella heyrðu af vefnum hennar sem væntanlegur er í loftið innan tíðar.

Hlín fékk mikið af kveðjum á Facebook-síðu sinni þar sem fólk vonaði að hún myndi fljótt jafnaði sig. Ein konan skrifaði þó: „Vá, Hlín. Þú ert galdrakona að ná athygli. Gefðu mér uppskriftina."

Þáttarstjórnendur Í bítið hringdu í Hlín í morgun til að heyra hvernig hún hefði það. „Ég er góð núna, aðeins smá marin og svona en maður er svo fljótur að jafna sig. Þetta er aðallega vont þegar það gerist," sagði Hlín.

Hún var orðin heldur hress og sagði á léttu nótunum að hún bæri engan kala til þáttarstjórnenda.

Hlín á vanda til að fara úr axlarlið og hefur alls farið fimmtán sinnum úr lið. Hún hefur þó farið í aðgerð vegna þessa og eru fjögur ár síðan hún fór síðast úr axlarlið. „Þetta var rosalegt sjokk í gær. Ég trúði ekki að þetta hefði gerst," sagði hún.

Hún var flutt með sjúkrabíl í gær úr hljóðverinu og beint á sjúkrahús þar sem hún var svæfð áður en henni var kippt aftur í lið. Hún segir að þar sem þetta hafi gerst svo oft þá hafi hún hætt að geta slakað á nógu vel vakandi til að hægt sé að kippa henni í liðinn á ný. Í síðustu tvö skipti hafi hún því fengið svæfingalyf á borð við ketamín og verið alveg rotuð.

Þáttarstjórnendur báru henni góða kveðju og búast við að fá hana aftur í þáttinn á allra næstu dögum.

„Endilega, ef þið þorið að fá mig," sagði Hlín að lokum.

Hægt er að hlusta á þátt morgunsins með því að smella á tengilinn hér fyrir ofan. Viðtalið við Hlín hefst þegar um 33 mínútur eru liðnar af þættinum.