Alonso dugar fjórða sætið ef Vettel vinnur, en annað ef Webber sigrar

Tölfræðingar og spekingar spá mikið í möguleika Formúlu 1 ökumanna í lokamótinu í Abu Dhabi um næstu helgi og Ferrari menn hafa tekið þá afstöðu að rýna ekki í tölfræðina, því hægt er að reikna málin á marga vegu og reyna að sigra lokamótið. Alonso á Ferrari er efstur í stigamótinu, en fjórir ökumenn eiga möguleika á titlinum. Alonso er efstur með 246 stig í stigamóti ökumanna, Webber 238 og Vettel 231, en Hamilton 222. Fyrir sigur í einstöku móti fást 25 stig, annað sætið 18, þriðja 15, fjórða 12, fimmta 10 og síðan færri stig fyrir næstu sæti á eftir. Í ljósi þess að Red Bull menn unnu mótið í Brasilíu á sunnudaginn tvöfalt, með þeim Sebastian Vettel og Mark Webber og Vettel og Webber voru líka í fyrsta sæti og öðru sæti í Abu Dhabi í fyrra, sem verður líka lokamótið í ár, þá er trúlega mest spáð í hvað Alonso þarf að gera verði annar Red Bull ökumannanna sigurvegari á sunnudaginn. Ef Webber vinnur mótið í Abi Dhabi, þá verður Alonso að ná öðru sæti til að landa meistaratitlinum, Webber væri þá með 263 stig, en Alonso 264. Ef Vettel vinnur mótið, þá dugar Alonso að ná fjórða sæti til að hampa titlinum í stað Vettels, ekki því fimmta eins og sagt var frá á visir.is í gær og er beðist velvirðingar því. Ef Alonso verður fimmti og Vettel fyrstur, þá fengju báðir 256 stig og þeir væru báðir með sama árangur hvað varðar fyrsta, annað og þriðja sæti. En Vettel fengi titilinn, þar sem hann er búinn að vera þrisvar í fjórða sæti, en Alonso bara tvisvar. Svo bætist við þetta að ef Webber nær öðru sæti á eftir Vettel, þá yrði hann líka með 256 stig, en 4 sigra en Alonso og Vettel 5 og Webber tapar því fyrir þeim. Lewis Hamilton á líka möguleika en verður að vinna í Abu Dhabi og fær þá 247 stig. Alonso má þá ekki fá nein stig í mótinu, sem þýðir að hann verður að vera í ellefta sæti eða neðar. Webber verður að sama skapi að lenda í sjötta sæti eða neðar og Vettel má ekki vera ofar en í þriðja sæti. Ef þetta yrði lokastaða keppinauta Hamiltons, þá ynni hann titilinn með einu stigi á Webber og Vettel. Svo getur Alonso einfaldlega unnið mótið og ekkert verið að spá í stigin, sem virðist vera markmið Ferrari að sögn Stefano Domenicali, yfirmanns liðsins. Hann segir að þeir muni reyna allt til að vera fljótastir í tímatökum og kappakstrinum.