Fóstbræður á leiksvið

Grínhópurinn Fóstbræður hertekur stóra svið Borgarleikhússins í mars á næsta ári þegar ný leiksýning úr smiðju hans verður frumsýnd. Upphaflegi hópurinn kemur að þessari uppfærslu en hann samanstendur af Jóni Gnarr, Benedikt Erlingssyni, Sigurjóni Kjartanssyni, Gunnari Jónssyni, Helgu Brögu og Hilmi Snæ Guðnasyni. Benedikt mun hins vegar láta sér nægja að sitja í leikstjórastólnum. Hópurinn hefur þegar hist á nokkrum fundum og er byrjaður að skrifa handrit að sýningunni.

„Já, já, það er verið að draga elliheimilið Fóstbræður á flot,“ segir Fóstbróðirinn Þorsteinn Guðmundsson í samtali við Fréttablaðið. Hann segir þetta hafa verið hugmynd sem hafi verið ansi lengi í fæðingu. „Ég segi ekki að þetta hafi verið einhver draumur sem við höfum gengið með í maganum alveg rosalega lengi heldur meira hugmynd sem kviknaði fyrir langalöngu,“ segir Þorsteinn en það var forsvarsmaður viðburðarfyrirtækisins Bravo, Ísleifur B. Þórhallsson, sem viðraði þetta við hópinn fyrir ári.

Þorsteinn segir sýninguna verða byggða upp á stuttum leiknum atriðum, svokölluðum „sketsum“ líkt og þáttaröðin var. „Við erum bara búnir að átta okkur á því að við erum ekki dauðir úr öllum æðum, það eru alls konar hugmyndir í gangi og það eina sem ég veit er að við ætlum að gera þetta af fullum krafti, það er annaðhvort heimsyfirráð eða dauði,“ segir Þorsteinn og rifjar upp í gamni að fólk hafi nú ekki verið ýkja hrifið af fyrstu þáttum Fóstbræðra. „Nei, síður en svo. Fólk skellti hurðum og hringdi niður á Stöð 2 til að segja upp áskriftinni. Þetta verður eitthvað svipað, við ætlum okkur að reyna á þolmörk áhorfenda. Við værum ekkert Fóstbræður ef við værum ekki smá óþolandi.“

freyrgigja@frettabladid.is