Bush ekki treystandi fyrir skærum

Breski gamanleikarinn Russell Brand var viðmælandi tímaritsins Playboy fyrir skemmstu þar sem hann svaraði tuttugu laufléttum spurningum.

Brand var meðal annars spurður út í þegar hann var kynnir á MTV verðlaunahátíðinni fyrir nokkrum árum síðan og kallaði George Bush, fyrrum Bandaríkjaforseta, þroskahefta kúrekann og hlaut miklar skammir fyrir.

„Ég hélt ekki að þetta mundi koma mér í vandræði, ég meinti þetta sem hrós. Ég var í raun ekki að setja út á hinn þroskahefta Bush heldur að hrósa Bandaríkjamönnum fyrir að vera svo franmsæknir að leyfa þessum takmarkaða manni að stýra landinu í svo langan tíma. Í mínu heimalandi hefði Bush ekki einu sinni verið treyst fyrir skærum," sagði grínistinn.