Forseti Eistlands bað um einkatónleika hjá Bedroom Community

„Þetta var mjög sérstakt," segir Sturla Mio Þórisson, hljóðversstjóri í Gróðurhúsinu.

Toomas Hendrik Ilves, forseti Eistlands, heimsótti hljóðverið á miðvikudagskvöld ásamt eiginkonu sinni Evelin og föruneyti sínu.

Það samanstóð af 25 manna sendinefnd og hópi lífvarða.

„Við höfum aldrei tekið á móti svona þjóðhöfðingja í stúdíóinu áður. Það var líka skrýtið að hafa þarna menn sem voru talandi ofan í ermina á sér," segir Sturla.

Forsetinn, sem er staddur hér á landi í opinberri heimsókn, er mikill áhugamaður um tónlist og er sérlegur aðdáandi þeirra tónlistarmanna sem gefa út hjá Bedroom Community, sem hefur aðstöðu í Gróðurhúsinu.

Hann missti af tónleikum sem Valgeir Sigurðsson, Daníel Bjarnason og Nico Muhly úr Bedroom Community héldu í Tallin í Eistlandi á dögunum og óskaði því eftir að komast á hálfgerða einkatónleika í Gróðurhúsinu.

Þar spiluðu fyrir hann þeir Daníel Bjarnason og Ben Frost. „Hann virtist mjög sáttur. Það lofuðu þetta allir í hástert," segir Sturla um viðbrögð forsetans og föruneytisins. Eftir heimsóknina, sem stóð yfir í um eina og hálfa klukkustund, kíkti hluti sendinefndarinnar á Kaffibarinn en forsetahjónin létu það vera, enda orðin þreytt eftir langan og strangan dag.