Foreldrar töldu rétt að rýma Götusmiðjuna

Forsvarsmenn Barnaverndarstofu funduðu í gær með aðstandendum ungmenna sem voru í meðferð í Götusmiðjunni. Faðir pilts sem þar dvaldi segir að sættir hafi náðst við Barnaverndarstofu og greinilegt sé á þeim gögnum sem lögð voru fyrir foreldra að rétt hafi verið að rýma staðinn. Nýtt meðferðarúrræði verður tekið í notkun kvöld.

Fundurinn var að sögn föður sem sem fréttastofa ræddi við langur og strangur en árangursríkur. Faðirinn segir að í upphafi fundarins hafi flestir foreldranna hafi verið á þeirri skoðun að rangt hafi verið að loka Götusmiðjunni.

Foreldrarnir hafi hins vegar skipt um skoðun eftir að hafa skoðað gögn sem lögð voru fram á fundinum. Þau hafi afdráttarlaust sýnt að Guðmundur Týr Þórarinsson, forstöðumaður Götusmiðjunnar, hafi brotið trúnað við ungmennin og sýnt af sér framkomu sem hafi verið óviðeigandi og til þess fallin að skapa ótta og tortryggni.

Sættir hafi því náðst milli Barnaverndarstofu og foreldra.

Þá segir faðirinn að Bragi Guðbrandsson, forstjóri Barnaverndarstofu, hafi viljað vera í ráðum við foreldra um framvindu mála og leitað ráða hjá þeim.

Foreldrar hafi verið sammála um að góð lausn yrði að starfsmaður sem Guðmundur Týr sagði upp störfum fyrir skömmu yrði ráðinn á ný á vegum Barnaverndarstofu til Foreldrahúss. Þaðan gæti hann leiðbeint og verið í samskiptum við unglingana áður voru í Götusmiðjunni. Milli þess starfsmanns og ungmennanna hafi ríkt mikill trúnaður og hafi ungmennin orðið mjög ósátt við Guðmund Tý eftir að hann rak starfsmanninn fyrirvaralaust .

Faðirinn tekur þó fram að hann sé sannfærður um að Guðmundur Týr hafi gert margt gott í gegnum tíðina. Störf hans undanfarinn misseri hafi þó hvorki verið honum né börnunum til framdráttar. Það sýni gögn Barnaverndarstofu og vitnisburður starfsmanna sem unnið að hafa í Götusmiðjunni.

Bragi Guðbrandsson segir að verið sé að leggja lokahönd á samning við Foreldrahús sem geri ráð fyrir því að nokkrir starfsmenn götusmiðjunnar taki að sér að veita áframhaldandi þjónustu við barnahópinn einstaklingsráðgjöf auk þess sem sálfræðiþjónusta verður veitt á vegum Foreldrahúss. Stefnt er á að sú starfsemi hefjist þegar í kvöld.