Menningarstaðir á Akureyri skella í lás

„Það væri slæmt fyrir bæinn og tónlistarlífið að missa staðinn,“ segir Haukur Tryggvason, veitingamaður á Græna hattinum á Akureyri. Framtíð Græna hattsins er óljós eftir að leigusamningi við staðinn var sagt upp. Áformað er að opna annars konar skemmtistað í húsinu, en erindi þess efnis liggur fyrir hjá skipulagsstjóra Akureyrar.

Græni hatturinn hefur verið einn vinsælasti tónleikastaður landsins undanfarin misseri. Á síðasta ári voru 130 tónleikar haldnir á staðnum. „Það hefur gengið alveg ótrúlega vel,“ segir Haukur og bætir við að staðurinn sé alltaf að sækja í sig veðrið. „Ferðafólk er farið að stíla ferðirnar inn á dagskrána. Stórir hópar hafa samband í hverri viku og spyrja hvað sé að gerast á Græna hattinum.“

Veitingastaðnum Friðriki V. var einnig lokað á dögunum, en eins og Græni hatturinn var hann landsþekktur. Tónlistarmaðurinn Pálmi Gunnarsson býr á Akureyri og segir að Græni hatturinn hafi verið heimastaður tónleikahalds í bænum. „Það er hundleiðinlegt að horfa upp á, þegar verið er að mjaka upp ákveðnu menningarstigi, að það nái upp að vissu marki og svo sé skellt í lás. Það er alveg glatað,“ segir Pálmi ómyrkur í máli. „Það er skelfilegt helvíti ef þetta er niðurstaðan. Það eina sem maður getur vonað er að það verði fundinn annar staður til þess að byggja upp eitthvað svipað.“

Menningarhúsið Hof rís nú á Strandgötu á Akureyri, en Pálmi býst ekki við að það fylli skarðið sem Græni hatturinn skilur eftir sig. „Burtséð frá því að hér sé að rísa einhver steypuhöll sem á að kallast menningarhús,“ segir hann. „Það sem þar verður boðið upp á er ekki í nágrenni við Græna hattinn. Það er allt annar pakki.“

Hermann Jón Tómasson, bæjarstjóri Akureyrar, telur ekki að menningarlífið í bænum sé í útrýmingarhættu. „Þetta var hvoru tveggja fínasta starfsemi sem hefði gjarnan mátt vera áfram til staðar. Það er hins vegar ekki á okkar valdi og þá verðum við að vona að einhverjir aðrir sjái tækifæri í stöðunni og byggi upp eitthvað sambærilegt, eða eitthvað nýtt sem hefur sama aðdráttarafl.“

atlifannar@frettabladid.is