Út með forsetann og forsætisráðherra!

Ég vil breyta stjórnarskránni af því að hún endurspeglar gamla stjórnarhætti og hugsunargang einveldis. Hún snýst um að skipta völdum, en ekki að skilgreina ábyrgð og þjónustuhlutverk stjórnsýslunnar. Þótt þjóðfundurinn hafi nefnt mörg af þeim hugtökum sem er að finna í stjórnarskrá eru þau hugtök ekki höfð til hliðsjónar í framkvæmd, t.d. stjórnsýslunni.

Alþingi starfi sem löggjafarvald og hafi eftirlit með stjórnsýslunni.

Til alþingis sé kosið með beinni kosningu og landið sé fleiri en eitt kjördæmi.

Ráðherrar bjóði sig hver til síns ráðuneytis og þá sé landið eitt kjördæmi. Það þarf að skilgreina starfssvið ráðuneytanna eftir óskum þjóðfundar.

Þjóðfundurinn biður um ábyrgð og kallar eftir mannréttindum og jafnrétti sem verður þá að vera meginhlutverk eins ráðuneytis. Ný lagastofnun skilgreini alla lagasetningu út frá mannréttindum. Slík stofnun hafi málskotsrétt en einnig meirihluti þingmanna eða skilgreindur hópur kjósenda. Mannréttindaráðuneyti taki yfir verkefni Utanríkisráðuneytis.

Samskipti við erlend ríki þar með talið ESB mótist af Mannréttindum umfram annað.

Það er auðveldar að skipta kvóta eftir mannréttindum, en mannréttindum eftir kvóta.

Réttlæti og framkvæmd þess þarf síðan að taka fyrir í sér-ráðuneyti þar sem framkvæmd laga, öll lægri dómstig, lögregla, sýslumenn og saksóknari fari undir einn hatt til að fá skilvirkari framgang í rannsóknum og dómum á sakamálum.

Menntun og allt nám þarf að skilgreina út frá heiðarleika og vera alfarið og eina verkefni eins ráðuneytis. Í dag vitum við oft ekki hvort sé verið að tala við kennara í háskólanum eða stjórnmálamann.

Heilbrigðisþjónustan og félagsmálaþjónustan sameinist í einu ráðuneyti og helst öll framkvæmd færð til sveitarfélaganna. Þjónustan verði skilgreind eftir þörfum einstaklinga í nærsamfélaginu. Lýðræði í reynd er hve vel við skilgreinum aðstoð okkar við þá sem minna mega sín, en ekki hvernig við skiptum völdum.

Starfskyld leyfi og eftirlit með félögum og einstaklingum í starfi sé tekin fyrir í einu sama ráðuneytinu. Frelsi til athafna sé skilgreint með ábyrgð í huga af sama ráðuneyti, sem sér einnig um eftirlit með rekstri og starfssemi félaga og einstaklinga.

Fjármálaráðuneytið og efnahagsmálaráðuneytið verði sameinuð í eitt ráðuneyti.

Hlutverk skattheimtu og skatteftirlita og dóma færð undir önnur ráðuneyti, sem fyrr hafa verið talin.

Umhverfisráðuneytið taki yfir öll atvinnuvegaráðuneyti. Atvinnuvegir og auðlindir séu skilgreind út frá umhverfinu.

Það er hagur allra, líka atvinnuveganna að fá sameiginlega framtíðarsýn með umhverfið í fyrirrúmi.

Setja þarf á stofn sérstakt ráðuneyti menningar, lista og trúarbragða. Forsætisráðuneytið mætti því leggja niður og verða hluti af starfssviði Ráðherra menningarmála.

Varaforsætisráðherra væri síðan mannréttindaráðherra.

Forsetaembættinu sé breytt í embætti Braga og Iðunnar. Verkefni þeirra taki mið af því góða starfi sem Vigdís hefur sinnt enn flottar eftir að hún hætti að starfa sem forseti.

Þau starfi í nánu samstarfi við Menningarráðuneytið.

Karl og kona kosin með beinni kosningu og sinni saman embætti þannig að hér sé jafnrétti í verki.

Tilgangurinn sé að skerpa upp táknmynd heimilis frekar en valdabaráttu og klíkuskapar.

Þetta er leið til að öll hugtök þjóðfundar komi fram sem vel skilgreind atriði í stjórnsýslunni.

Sem sé endurhönnuð og útfærð sem þjónustuaðilar, en ekki sem valdastofnanir.

Skilaboð þjóðfundar var að stjórnsýslan sé ekki að virka, enda er allt skipulagt út frá forsendum valdabaráttu og skiptingu einveldis.

Vel skilgreing þjónustuhlutverk og ábyrgð hvers fyrir sig, skapar sátt stjórnsýslunnar við samfélagið.

Út með pólítiska matadorið, þar sem allt snérist um að komast til valda og áhrifa sérhagsmunum og klíkum til handa.

Ég býð mig fram af því að ég tel að viðhorf þjóðarinnar til stjórnarskráarinnar þurfa að breytast. Það er ekki nóg að varpa fram hugtökum á borð við jafnrétti og mannréttindi, við þurfum að finna réttu leiðirnar til að koma þeim í framkvæmd. Ég er sálfræðingur með mikla reynslu í sáttamiðlun og samningagerð. Stjórnarskráin á að snúast um mannleg samskipti og skilgreiningu hagsmuna fólks en ég hef einmitt góða innsýn í mannlega hegðun og þá sérstaklega samskipti í hópum, stórum sem litlum.