Framleiðslu hætt á Heroes, Law and Order og FlashForward

Bandarískar sjónvarpsstöðvar kynna haustdagskrá sína þessa dagana. Hjá NBC kemur í ljós að hætt hefur verið við framleiðslu á nokkrum vel þekktum þáttum sem hafa verið sýndir hér á landi.

Heroes er einn þeirra en áhorfendur hans kvörtuðu sáran yfir því hvernig þátturinn dalaði eftir þrusugóða fyrstu þáttaröð. Höfundur þeirra, Tim Kring, sagðist ætla að snúa aftur til rótanna í fjórðu þáttaröð en það dugði ekki til.

Þá hefur einnig verið hætt við framleiðslu réttar- og lögguþáttanna Law and Order eftir hvorki meira né minna en tuttugu ár í framleiðslu. Nafnið fær að vísu að lifa aðeins lengur því sjónvarpsstöðin ætlar að frumsýna nýjan þátt sem gerist í Los Angeles og byggir á sömu hugmynd. Einnig hefur verið hætt við framleiðslu á þáttunum FlashForward.

Meðal nýrra þátta er Undercover eftir JJ Abrams. The Office heldur áfram þrátt fyrir að aðalleikarinn Steve Carell sé ekki búinn að skrifa undir samning um framleiðslu þeirra.