Amadou og Mariam: fjórar stjörnur

Tónleikar ****

Amadou & Mariam

Laugardalshöll 12. maí

Listahátíð í Reykjavík

Það var nokkuð þétt setið í Laugardalshöll þegar upphitunarsveitin Retro Stefson hóf leik stundvíslega klukkan hálf níu á miðvikudagskvöldið. Þessi sjö manna hljómsveit fyllti skemmtilega út í sviðið í Höllinni og náði strax upp fínni stemningu með fjörmiklu danspoppinu sínu. Þau fengu áheyrendur til að standa upp og hreyfa sig, stíga dansspor og fallast í faðma.

Í fljótu bragði get ég ekki séð að önnur sveit hefði hentað betur til að hita upp fyrir aðalnúmer kvöldsins. Retro Stefson er alltaf að verða þéttari og þéttari, en maður er samt farinn að fá svolítinn leiða á að heyra alltaf sömu lögin hjá þeim. Fyrir stóran hluta áhorfenda í Höllinni sem var eflaust að sjá þau í fyrsta skipti hefur það ekki verið vandamál.

Eftir stutt hlé komu svo Amadou og Mariam á sviðið ásamt fjögurra manna hljómsveit. Amadou spilaði sjálfur á gítar, en auk hans voru hljómborðsleikari, bassaleikari, trommuleikari og slagverksleikari í hljómsveitinni. Eftir stutta kynningu byrjuðu þau á titillagi nýjustu plötu sveitarinnar, Welcome to Mali og svo komu lögin hvert af öðru, Magossa, Batoma, Afrika, Masitelati…

Stemningin var frekar erfið í byrjun. Flestir sátu sem fastast þrátt fyrir smitandi grúvið og það var eins og enginn þyrði að fara á dansgólfið sem hafði verið útbúið fyrir framan sviðið af ótta við að loka á útsýni þeirra sem sátu á fremsta bekk. Það tók heldur enginn undir þegar Amadou hvatti áheyrendur til að syngja með í laginu Ce n'est pas bon, enda fæstir í salnum með frönskuna á hreinu.

En smám saman hitnaði í salnum. Eftir að Mariam hafði yfirgefið sviðið í nokkur lög kom hún aftur og söng smellinn sem þau gerðu með Damon Albarn, Sabali, við góðar undirtektir. Og svo gerðist það allt í einu að hópurinn sem dansaði aftast í salnum stormaði fram að sviðinu og skömmu seinna höfðu flestir í salnum staðið upp og hreyfðu sig í takt við tónlistina. Eftir það var stemningin allt önnur.

Amadou og Mariam er hörku tónleikasveit. Tónlistin er sambland af afrískum ryþma, poppi og rokki.

Hljóðfæraleikararnir voru allir fyrsta flokks og skiptust á að sýna snilldartakta, en það sem dreif tónlistina áfram og er grunnur hennar er gítarleikur Amadous. Frábær gítarleikari!

Eftir uppklapp tók sveitin nokkur lög til viðbótar. Fyrst tóku þau Je pense à toi, sem er einn elsti smellurinn þeirra og eitt af þessum fullkomnu popplögum. Amadou og Mariam lokuðu svo dagskránni sem hafði staðið í tæpa tvo klukkutíma með gleðisöngnum Beaux dimanches af Dimanche à Bamako, plötunni sem þau gerðu með Manu Chao. Flottur endir á frábærum tónleikum.

Það hefur skapast hefð fyrir því að bjóða upp á heimstónlist á Listahátíð og er það vel. Tónleikar Amadou og Mariam bætast í hóp margra skemmtilegra heimstónlistartónleika á hátíðinni undanfarin ár.

Trausti Júlíusson

Niðurstaða: Blindu hjónin frá Malí skiluðu frábærum tónleikum í Laugardalshöll á miðvikudagskvöldið.

Hér er myndband við lagið Je pense à toi