Magnús Þorsteins markahæstur hjá Keflavík á Evrópumótinu í Futsal

Magnús Sverrir Þorsteinsson, skoraði flest mörk fyrir Keflvíkinga í Evrópukeppninni í Futsal, sem fram fór á Ásvöllum í Hafnarfirði og lauk í gær. Keflvíkingar unnu fyrsta leikinn sinn en töpuðu hinum tveimur og komust ekki upp úr riðlinum.

Magnús skoraði sex mörk í leikjunum þremur og varð annar markahæsti leikmaður riðilsins, einu marki á eftir Karim Bali, leikmanni Eindhoven. Magnús skoraði mörkin sín sex úr fjórtán skotum samkvæmt tölfræði á heimasíðu UEFA.

Guðmundur Steinarsson og Bojan Stefán Ljubicic komu næstir á eftir Magnúsi en þeir skoruðu báðir 3 mörk. Arnór Ingvi Traustason og Viktor Hafsteinsson skoruðu síðan báðir tvö mörk.