27 leikja sigurganga TCU á heimavelli á enda

Helena Sverrisdóttir skoraði fjórtán stig er lið hennar í bandaríska háskólaboltanum, TCU, tapaði fyrir Georgia á heimavelli, 60-57.

Þetta var fyrsta tap TCU á heimavelli í síðustu 28 leikjum liðsins en Georgia er talið þriðja sterkasta háskólalið Bandaríkjanna. Sigurkarfa leiksins var skoruð þegar þrjár sekúndur voru til leiksloka.

Helena lék í 40 mínútur í leiknum og nýtti alls þrjú af tíu skotum sínum utan af velli en öll sex vítaköstin sín. Hún tók fjögur fráköst, gaf tvær stoðsendingar og stal boltanum tvívegis.