Sigurjón Þórðar: 17. júní er ekki pylsu- og blöðruhátíð barna

„Það getur aldrei orðið annað en óhappaverk að afsala Íslandi umráðum yfir fiskveiðiauðlindinni en það er sérstaklega ósmekklegt að hefja slíkt ferli á sjálfan þjóðhátíðardaginn, dýpra verður ekki sokkið," segir Sigurjón Þórðarson, formaður Frjálslynda flokksins.

Tilefnið er bókun sem sex af sjö fundarmönnum á fundi Íþrótta- og tómstundaráðs Reykjavíkur samþykktu í gær. Þar var þeirri ósk beint til ríkisstjórnar Íslands að sjá til þess að skugga verði ekki varpað á hátíðarhöldin 17. júní með því að ákveða þann dag að hefja aðildarviðræður við Evrópusambandið. Leiðtogaráð ESB kemur að öllum líkindum næst saman 17. júní og á fundinum verður tekin ákvörðun um það hvort sambandið hefji aðildarviðræður við Ísland.

Segir ÍTR fáránlegan vettvang til að ræða utanríkismál

Stefán Jóhann Stefánsson, varaborgarfulltrúi Samfylkingarinnar, lagði bókunina fram. Hinn fulltrúi flokksins í ráðinu, borgarfulltrúinn Oddný Sturludóttir, lagði aftur á móti fram eftirfarandi bókun:

„ÍTR er fáránlegur vettvangur til að ræða utanríkismál, hvað þá hvenær ESB heldur fundi sína. 17. júní á að vera dagur barnanna í borginni - ekki andstæðra fylkinga í Evrópumálum."

Sigurjón segir á bloggsíðu sinni að hann þyki vænt um Stefán Jóhann skuli hafa tekið þetta frumkvæði. „Með sama hætti er dapurlegt að Oddný Sturludóttir borgarfulltrúi skuli ekki átta sig á inntaki dagsins en telja hann þjóna þeim einum tilgangi að vera coke, pylsu og blöðruhátíð barna."