Davíð Smári dæmdur fyrir ofbeldisbrot

Davíð Smári Helenarson var dæmdur í sex mánaða óskilorðsbundið fangelsi í morgun fyrir tvær líkamsárásir og eignaspjöll. Annarsvegar var hann dæmdur fyrir að hafa slegið karlmann í Austurstræti með þeim afleiðingum að hann hlaut tognun og ofreynslu á hálshrygg. Árásin átti sér stað í október 2008.

Þá var Davíð Smári einnig dæmdur fyrir að hafa slegið eiganda skemmtistaðarins Strawberries á Lækjargötu með krepptum hnefa með þeim afleiðingum að andlitsbein brotnaði. Árásin átti sér stað um hálfu ári eftir að hann lamdi manninn í Austurstræti.

Davíð Smári hefur áður verið dæmdur í 7 mánaða fangelsi fyrir hrottalegar líkamsárásir, meðal annars gagnvart fótboltadómara.