Hommablað segir Heru hafa verið rænda sigrinum

Blaðamaður eins stærsta hommablaðs heims, Gay Times, fullyrðir á bloggi blaðsins að Hera Björk hafi verið rænd sigrinum í Eurovision. Íslenska söngkona sé það besta sem hafi komið fyrir samkynhneigða menningu og tónlist í langan tíma. Íslenska lagið, Je nei se Quai, hafi verið besta lagið í keppninni og það sé næstum óskiljanlegt af hverju hún hafi ekki verið ofar. Þá hrósar hann myndbandi lagsins í hástert. Hera Björk segir sjálf mikið líf eftir 19.sætið í Osló, samkynhneigða menningarsenan hafi óskað eftir kröftum hennar og henni hafi nú þegar borist boð um að syngja á Gay Pride-göngum í Berlín, Munchen, Svíþjóð og New York.

Fréttablaðið ræddi stuttlega við blaðamanninn Bob Thompson sem fór fyrir hönd blaðsins á Eurovision. Hann segir eina ofureinfalda ástæðu fyrir því af hverju íslenska lagið fékk ekki fleiri stig.

„Allir vita að atkvæðagreiðslan í Eurovision er byggð á kunningsskap þjóða. Og það kemur Íslandi aldrei vel. Svo þegar jafn virtir Eurovision-lýsendur og Graham Norton gera gys að Íslandi þá geri ég ráð fyrir því að áhorfendur heima í stofu hafi fyrst og fremst hlustað á brandarana hans en ekki lagið," segir Bob sem spáir því að lagið eigi eftir að njóta mikillar hylli á skemmitstöðum fyrir samkynhneigða. Eins og Fréttablaðið greindi frá skömmu fyrir keppni þá virtist Hera Björk hafa unnið heitustu aðdáendu Eurovision-keppninnar á sitt band en þeir eru flestir samkynhneigðir karlmenn. Bob segir enga eina skýringu á því af hverju Hera sé elskuð af þessum hópi.

„Án þess að vilja ýta undir einhverjar steríótýpur þá elska hommar dívur. Hera er slík díva að hún nær þessari nærveru, glæsileika og kraftmiklu rödd án þess að vera yfirlætisleg. Sem gerir hana að dívu. Svo er lagið líka algjör snilld.

Hera Björk er fyllilega meðvituð að þessi hópur hugsi hlýlega til hennar. Það sjáist bara á þeim tilboðum um tónleikahald sem hún hafi fengið að undanförnu. „En það eru ekki bara hommar heldur hef ég fengið tölvupósta í gegnum heimasíðuna mína frá húsmæðrum sem eru ákaflega þakklátar fyrir það sem mér tókst og sjá í því ákveðið tækifæri," segir Hera en eins og áður segir hefur hún verið beðin um að troða upp á gleðigöngum um alla Evrópu og í Bandaríkjunum. Hera á leiðinni til Hollands um næstu helgi að syngja á risastórri tónlistarhátíð og hún segist finna fyrir miklum meðbyr.

„Samkynhneigðir hafa bara einfaldlega góðan smekk. Þetta er stór markaður og ekki má gleyma því að þetta er fólk sem á peninga og kaupir plötur."

freyrgigja@frettabladid.is