Erlendar hótelkeðjur sýna Austurhöfn áhuga

Höskuldur Ásgeirsson, framkvæmdastjóri Situsar systurfélags Portusar, sem heldur utan um rekstarfélag hótels við tónlistarhúsið við Austurhöfnina, segir að fjölmargar erlendar hótelkeðjur sýni rekstri hótels við tónnlistarhúsið áhuga. Stefnt er að því að þar rísi 250 herbergja hótel árið 2013.

Í upphaflegum áætlunum var gert ráð fyrir að 400 herbergja hótel og íbúðarhús með 100 lúxusíbúðum myndi rísa við hlið tónlistarhússins. Hætt var við þessi áform vegna efnahagsástandsins en ekki þóttu lengur forsendur fyrir slíku.

„Við gerum ráð fyrir að hótelið rísi 2013 og verði tekið í notkun það ár. Við erum með í gangi skoðun á þessu máli. Það er verið að gera viðskiptaáætlanir fyrir mögulegt hótel á svæðinu og fyrstu upplýsingar gefa til kynna að það sé mjög góður rekstrargrundvöllur fyrir hótel þarna," segir Höskuldur Ásgeirsson, framkvæmdastjóri Situsar. Situs vinnur nú að því að finna fjárfesti til að byggja hótelið og leiða saman fjárfesti og erlenda hótelkeðju sem kæmi til með að reka hótelið.

„Við höfum fundið fyrir mjög sterkum áhuga, nú nýverið, hjá þekktum erlendum hótelkeðjum sem telja að þetta sé mjög sterk og góð staðsetning, góð tengsl við ráðstefnu- og tónlistarhúsið, Hörpuna, og miðbæinn," segir Höskuldur.

Ekki liggur fyrir hver bein útgjöld Situsar verða verkefnisins, en jafnframt liggur ekki fyrir hvernig kostnaðarskiptingin verður milli Situsar og erlenda fjárfestisins sem mun fjármagna byggingu hótelsins.