Mateja Zver fagnaði verðlaununum með tvennu á móti Grindavík

Þór/KA minnkaði forskot Vals á toppi Pepsi-deildar kvenna í fjögur stig með 5-0 sigri á Grindavík á Akureyri í kvöld. Mateja Zver skoraði tvö mörk í leiknum og lagði upp það þriðja en hún var í gær kosin besti leikmaður fyrri umferðarinnar af þjálfurum í deildinni.

Mateja Zver skoraði fyrstu tvö mörkin og átti síðan stoðsendinguna á fyrirliðann Rakel Hönnudóttur í þriðja markinu. Arna Sif Ásgrímsdóttir og Gígja Valgerður Harðardóttir innsigluðu síðan sigurinn í lokin.

Valur er með 26 stig eftir 10 umferðir en Þór/KA er í 2. sæti með 22 stig. Stjarnan og Breiðablik koma síðan næst með 17 stig.

Upplýsingar um markaskorara eru fengnar af netmiðlinum fótbolta.net.