Spenningurinn mikill

Hljómsveitin SILFUR gaf nýverið út sinn fyrsta geisladisk sem fékk nafnið Ekkert Vesen. Á meðfylgjandi myndum má sjá þegar bandið hélt útgáfutónleika í tilefni plötunnar á Sódómu Reykjavík. Auk Thelmu Hafþórsdóttur Byrd söngkonu, Andra Hrannars trommara, Stefán Þórs bassaleikara og Sveins Pálssona gítarleikara fékk bandið til liðs við sig góða og hæfileikaríka vini.

„Okkur fannst mikilvægt að halda stemningunni á disknum og ákváðum því að fá Guðmann Sveinsson gítarleikara Trútón til að þétta flutninginn okkar á sviðinu enn frekar. Svo fengum við Írisi Hólm söngkonu Bermuda og Erlu Jónatansdóttur söngkonu Dægurflugnanna til að syngja bakraddir. Einnig fengum við Daða Georgsson í Default Studios sem tók upp plötuna okkar til að sjá um hljóðið og Sigurð Grétar Kristjánsson til að taka tónleika upp á myndband. Svo það má segja að þessir tónleikar hafi verið svona dýrari týpan og þannig vildum við hafa það," sagði Thelma.

„Já, við vildum hafa þetta sérstakt enda eru þetta fyrstu útgáfutónleikarnir okkar allra og því skemmtilegt að taka þetta alla leið. Við vorum sótt á Cadilac limmósíu heim til mín þar sem hittumst fyrir tónleikana. Það var ótrúlega skemmtileg tilfinning að renna í hlað þar sem ljósmyndarar og tónleikagestir biðu okkar fyrir utan. Ef þetta er ekki lífið þá veit ég ekki hvað! Ég klæddist kjól frá Lindu Mjöll mágkonu minni frá E-label sem var flottur en þægilegur en svo voru það bara leður-leggins og háu stígvélin eins og svo oft áður. Maður verður að spila og líða gorgeous en þægilega," sagði hún.

„Hljómsveitin spilaði lög plötunnar fyrsta lagi til hins síðasta 11 ásamt því að kynna lögin sérstaklega fyrir tónleikagestum sem voru ýmis að heyra lögin í fyrsta skipti eða heyrt þau á disknum. Gestir fengu smá innsýn inn í lögin því bandið deildi með hlustendum söguna á bak við lögin eins og hvernig lagið varð til og af hverju hvert lag hefði endað á plötunni.

„Flest laganna höfum við aldrei spilað live og því var spenningurinn mikill í bandinu. Við vorum búin að æfa þau vel en auðvitað eru alltaf smá fiðrildi þegar maður spilar sitt eigið efni í fyrsta skipti opinberlega. En stemningin í salnum var rosalega góð og okkur leið vel upp á sviðinu og fannst gaman að deila þessu persónulega með fólkinu í salnum. Fólk var svo duglegt að lofa okkur eftir tónleikana að ég þori alveg að segja að við erum ótrúlega stolt af okkur. Svo enduðum við kvöldið á að taka tvö bestu balllögin okkar; Final Countdown og Sweet Child of Mine svo að það hljóta allir að hafa fengið eitthvað fyrir sinn snúð. Ég gæti allavega ekki verið sáttari með þetta og ég held að Bubbi megi vera ánægður með mig," sagði Thelma.

Á disknum má finna níu frumsamin lög en þar að auki tvö tökulög sem bandið tók upp á sína arma og ættu að vera öllum Íslendingum kunn. Það eru lögin Valur og jarðarberjamaukið hans sem flestir þekkja sem Hvað er að ske með Grýlunum og svo Slappaðu af sem Flowers gerðu vinsælt á sínum tíma. Platan er í anda bandsins: Poppuð með rokkuðu ívafi.

Platan er komin í valdar verslanir Hagkaupa, Pennans og Skífunnar en auk þess er hægt að festa kaup á plötunni á tonlist.is.