Nefbraut kærustuna og myndbirtir kynferðisbrotamenn

„Þetta eru allt myndir sem hafa verið birtar áður í fjölmiðlum og mennirnir hafa verið dæmdir," segir Skúli Steinn Vilbergsson, en hann heldur úti síðu á samskiptavefnum Facebook, þar sem hann nafn- og myndbirtir barnaníðinga og nauðgara.

Vefurinn er umdeildur svo ekki sé meira sagt. Meðal annars gagnrýndi lögmaðurinn Sveinn Andri Sveinsson vefinn harðlega í viðtali á Pressunni.is í morgun.

En vefurinn hefur fengið góðar viðtökur á Facebook. Eftir vikulanga tilvist eru um 1600 meðlimir í klúbbnum sem eru sammála hugmyndum Skúla um að það eigi að mynd- og nafnbirta menn sem hafa hlotið dóma fyrir gróf kynferðisbrot.

Aðspurður hvort slíkar upplýsingar séu ekki til þess fallnar að skapa múgæsing eða jafnvel setja hina dæmdu í hættu svarar Skúli: „Hafa þeir ekki bara gott af því?"

Skúli bendir á að allar myndirnar og nöfnin hafi áður verið birt í fjölmiðlum. Hann segist eingöngu safna þeim saman og birta á einum stað. Að sögn Skúla hefur hann fengið sent í pósti bæði nöfn og myndir af meintum kynferðisbrotamönnum sem ekki hafa hlotið dóma fyrir meintu brotin sín.

„En það er ekki liðið," fullyrðir Skúli.

Sjálfur er Skúli ekki ókunnugur réttarkerfinu. Það eru ekki nema rúmir tveir mánuðir síðan hann var dæmdur í fimm mánaða skilorðsbundið fangelsi í Héraðsdómi Reykjaness fyrir að nefbrjóta kærustuna sína. Hann var dæmdur fyrir að slá hana í andlitið með glasi þannig hún nefbrotnaði auk þess sem hún hlaut skurð í andlitið.

Skúli Steinn neitaði að hafa kastað glasinu í kærustu sína. Kvaðst hann hafa misst glasið þegar að kærasta hans sparkaði í klofið á honum. Sjálfur er Skúli fyrrum atvinnumaður í boxi.

Spurður hvort honum fyndist í lagi að vera myndbirtur, til dæmis á síðu þar sem konur eru varaðar við ofbeldisfullum mönnum, svarar Skúli: „Ég var ranglega dæmdur. Ég er búinn að áfrýja málinu til Hæstaréttar."

Dómur er ekki fallinn í Hæstarétti. Þá bendir Skúli einnig á að lögmaðurinn Sveinn Andri, sem gagnrýndi síðuna á Pressunni, er lögmaður fyrrverandi kærustu hans. Því geti hann tæpast verið hlutlaus í þessu máli að mati Skúla.

Þegar Skúli er spurður að lokum hvort hann ætli að loka síðunni svarar hann:

„Það er ekki nokkur ástæða til þess. Ég er ekki að brjóta af mér. Ég er eingöngu að gera það sem yfirvöld hafa ekki kjark til þess að gera."