Drykkjufélagarnir gætu átt afturkvæmt til Rangers

Walter Smith, knattspyrnustjóri Rangers, hefur gefið í skyn að þeir Barry Ferguson og Allan McGregor gætu snúið til baka í lið félagsins.

Þeir Ferguson og Rangers vöktu hneykslan margra með framkomu sinni í kringum landsleiki Skota gegn Hollandi og Íslandi um mánaðamótin síðustu. Þeir fóru á fyllerí eftir leikinn gegn Hollandi og máttu vegna þess dúsa á varamannabekknum gegn Íslandi.

Daginn eftir leikinn gegn Íslandi birtist myndir af þeim á útsíðum allra helstu dagblaða í Skotlandi þar sem þeir mynduðu hið svokallaða V-merki sem þykir afar móðgandi tákn í Bretlandi.

Í kjölfarið voru þeir settir í ævilangt bann hjá skoska landsliðinu. Walter Smith, stjóri Rangers, ákvað að senda þá í tveggja vikna launalaust leyfi og töldu margir að dagar þeirra hjá félaginu væru taldir.

Smith tók þar að auki fyrirliðabandið af Ferguson, rétt eins og hafði verið gert hjá skoska landsliðinu.

Hann segir þó nú að hann hafi ef til vill verið of harkalegur í garð þeirra tveggja.

„Ég sagði blaðamönnum „off the record" að þeir myndu ekki spila með Rangers aftur."

„Síðan þá hef ég hugsað um málið og hvernig skoska knattspyrnusambandið tók á því. Bæði forseti sambandsins og landsliðsþjálfari hafa sagt að ekki hafi verið tekið rétt á upphaflega vandamálinu."

„Ég hef því spurt sjálfan mig af því hvort ég hafi verið of harkalegur í mínum aðgerðum. Ef þeir sem hafa völdin segja að ekki hafi verið tekið rétt á málinu finnst mér að ég verði að sýna þeim vægð."

„Ég hef rétt á því að skipta um skoðun," sagði Smith. „En það sem ég er að segja er að þeir koma til greina í liðsvali mínu á nýjan leik - ekki endilega að þeir muni spila."

Smith gagnrýndi einnig skoska knattspyrnusambandið fyrir að láta þá Ferguson og McGregor eina taka sökina.

„Það voru sex leikmenn sem flæktust í málið og aðeins tveir fengu alla sökina. Svo virðist sem að skoska knattspyrnusambandið telji að enginn glæpur hafi verið framinn ef sökudólgarnir yfirgefa vettvang glæpsins nægilega snemma."