Sigurður Ragnar hætti við æfingu stelpnanna í morgun

Sigurður Ragnar Eyjólfsson, landsliðsþjálfari, hætti við að hafa æfingu hjá íslenska kvennalandsliðinu í morgun en hann ætlar greinilega að gefa stelpunum meiri tíma til að sleikja sárin og jafna sig eftir tapleikinn á móti Frökkum í gær.

Sigurður Ragnar var annars heillengi með liðið út á velli eftir leikinn í gær þar sem allir leikmenn voru látnir hlaupa. Varamenn og þeir leikmenn sem spiluðu ekki voru í löngum sprettum en byrjunarliðið var látið hlaupa sig niður og að því virtist gott betur.

Íslenska liðið mun æfa seinna í dag og hefja þá formlega undirbúning sinn fyrir Noregsleikinn á fimmtudaginn en það er þó enginn vafi á því að landsliðsþjálfarinn hefur notað daginn í dag til þess að rífa upp stelpurnar sem voru allar mjög langt niðri eftir tapið í gær.