Klaufamarkið var dýrkeypt - Boruc hent út úr landsliðinu

Þetta var allt annað en góð helgi fyrir pólska markvörðinn Artur Boruc sem spilar með skoska liðinu Celtic. Artur Boruc fékk á sig algjört klaufamark í 2-3 tapi Pólverja fyrir Norður-Írum í undankeppni HM.

Landsliðsþjálfari Póllands, Leo Beenhakker, sem einnig kenndi Boruc um fyrsta mark leiksins, ákvað að senda markvörðinn sinn heim til Skotlands og mun Boruc því ekki taka þátt í leiknum á móti San Marínó í vikunni.

Markið sem gerði útslagið var þriðja og síðasta mark Norður-Íra sem var sjálfsmark Michal Zewlakow sem gaf boltann aftur á Boruc sem missti hann klaufalega framhjá sér og í netið. Markið kom á 61. mínútu og komust Norður-Írar þá í 3-1.

Beenhakker segir aðalástæðuna fyrir að hann taki Boruc úr liðinu sé til að taka hann úr skotlínunni því hann hafi mátt þola harða gangrýni heima fyrir eftir leikinn.

„Ég talaði við hann á hreinskilin hátt um að ég ætlaði ekki að nota hann á móti San Marínó. Þið getið rétt ímyndað ykkur hversu mikil áhrif þetta allt hefur haft á Artur og við töldum það best að hann myndi fara strax til Glasgow," sagði Beenhakker.