Fernando Torres: Það vilja allir vinna Evrópumeistarana

Spánverjar geta unnið sinn sjötta leik í sex leikjum undankeppni HM þegar þeir heimsækja Tyrki til Istanbúl á morgun. Liðin mættust einnig um síðustu helgi á Spáni og þar unnu Evrópumeistararnir nauman 1-0 sigur.

„Leikirnir eru alltaf að verða erfiðari og erfiðari fyrir okkur því allir vilja vinna Evrópumeistarana," sagði Fernando Torres, framherji Liverpoool og spænska landsliðsins, á blaðamannafundi fyrir leikinn.

„Ef við vorum í vandræðum með Tyrki á heimavelli þá verður ennþá flóknara mál að vinna þá á miðvikudaginn. Þeir hafa þegar sýnt okkur að þeir eru með gott lið og að þeir hafa mikla löngun til þess að vinna okkur," sagði Fernando Torres.

„Með sigri þá tökum við stórt skref í átt að lokakeppninni. Áður vorum við í vandræðum í undankeppninni en landsliðið hefur þróast og þroskast. Við erum komnir með frábært lið og vonandi getum við haldið því gangandi sem lengst," sagði Torres.