Meintir kannabisræktendur lausir úr haldi

Tveir karlar og ein kona voru handtekin í þágu rannsóknar á umfangsmiklu kannabisræktunarmáli sem fréttastofa sagði frá í morgun. Fólkið er nú laust úr haldi lögreglu. Samkvæmt upplýsingum frá lögreglunni fundust nokkur hundruð plöntur á ýmsum stigum ræktunar í Laugadalshverfinu og hefur fréttastofa heimildir um að þar sé átt við hús í Skipasundi.

Mennirnir, sem handteknir voru, hafa áður komið við sögu hjá lögreglu. Þeir eru á fimmtugs- og sextugsaldri en konan er á fertugsaldri. Fram kemur í fréttatilkynningu frá lögreglunni að lögreglan hafi stöðvað kannabisræktun í Vesturbergi í Breiðholti fyrir fáeinum dögum og talið sé að málin tengist.

Samtals er um að ræða rúmlega 400 kannabisplöntur sem voru haldlagðar í þessum tveimur húsleitum.