Helgi Valur: Nýtti tækifærið vel

Helgi Valur Daníelsson sagðist ánægður með frammistöðu sína í leik Skotlands og Íslands í gær. Skotar unnu leikinn, 2-1.

„Þetta var kannski minn fyrsti alvöru landsleikur þar sem ég fékk að spila í minni stöðu. Það var auðvitað svekkjandi að tapa en gaman að taka þátt í þessum leik," sagði Helgi Valur í samtali við Vísi.

„Það vantaði nokkra leikmenn í hópinn fyrir þennan leik og þegar að Brynjar Björn datt svo út vegna meiðsla vissi ég að ég ætti séns. Þetta er líka ungt lið og er ég elsti miðjumaðurinn sem var eftir í hópnum þó svo að ég hafi ekki spilað marga landsleiki á ferlinum," sagði hann enn fremur.

„Ég var bara nokkuð sáttur við mína frammistöðu. Mér fannst ég sinna minni vinnu í varnarleiknum ágætlega. Ég vona bara að ég hafi gert nóg til að vera áfram í myndinni nú þegar aðrir menn koma aftur inn."

Hann sagði íslenska liðið hefði mátt sækja meira í leiknum.

„Við hefðum mátt þora að gera meira þegar við vorum með boltann. Kannski að við bárum of mikla virðingu fyrir þeim en ég tel að við séum alveg jafn góðir og þeir."