Messi og Tevez skoruðu fyrir Argentínu

Þrír leikir fóru fram í gær í undankeppni HM 2010 í Suður-Ameríku. Argentína vann 4-0 sigur á Venesúela og Úrúgvæ vann granna sína í Paragvæ, 2-0.

Þeir Lionel Messi, Carlos Tevez, Maxi Rodriguez og Sergio Agüero skoruðu mörk Argentínu í leiknum.

Argentína er í öðru sæti undankeppninnar með nítján stig eftir ellefu leiki.

Paragvæ tapaði aðeins sínum öðrum leik í keppninni í nótt og er enn á toppi riðilsins með 23 stig. Úrúgvæ hoppaði upp í fjórða sætið með sigrinum í gær en þeir Diego Forlan og Diego Lugano skoruðu mörk Úrúgvæ í leiknum.

Þá vann Kólumbía sigur á Bólivíu, 2-0.

Tveir leikir fara svo fram í dag í Suður-Ameríku. Ekvador tekur á móti Brasilíu og Perú mætir Chile á heimavelli.

Fjögur efstu liðin í riðlinum komast beint áfram á HM í Suður-Afríku. Liðið sem verður í fimmta sæti mætir liðinu sem verður í fjórða sæti í undankeppninni í Mið- og Norður-Ameríku í umspili um eitt laust sæti á HM.

Staðan:

Paragvæ 23 stig* (+10 í markatölu)

Argentína 19* (+10)

Brasilía 17 (+11)

Úrúgvæ 16* (+11)

Chile 16 (+1)

Kólumbía 14* (-2)

Ekvador 12 (-5)

Venesúela 10* (-10)

Bólivía 9* (-11)

Perú 7 (-15)

*eftir ellefu leiki, önnur lið hafa leikið tíu leiki.