Alltof dýrt að sýna frá EM í Finnlandi? - Norðmenn sýna ekkert

Það kom fram í norsku fjölmiðlunum í gær að norsku sjónvarpsstöðvarnar ætla ekki að sýna beint frá Evrópukeppni kvenna í fótbolta sem fram fer í Finnlandi í haust. Norðmenn eru í riðli með Íslandi, Frakklandi og Þýskalandi.

Norðmönnum þykir sýningarrétturinn frá keppninni vera alltof dýr og að UEFA hafi kolranga hugmynd um hversu mikils virði hann sé. Samkvæmt Aftenposten á Eurosport réttinn á að sýna frá Evrópumótinu en mótið fer fram í ágúst og september næstkomandi.

Norðmenn eru kannski ekki eins spenntir fyrir EM kvenna í fótbolta og nágrannar þeirra í Svíþjóð, Danmörku, Finnlandi og á Íslandi enda gekk norska liðinu mjög illa í Algarve-bikarnum og tapaði meðal annars 3-1 fyrir íslensku stelpunum.