Ferguson og McGregor vísað úr skoska landsliðinu vegna drykkju

Skoska knattspyrnusambandið hefur staðfest að hvorki landsliðsfyrirliðinn Barry Ferguson né Allan McGregor, markvörður, verði með liðinu gegn Íslandi í kvöld.

„Við getum staðfest að það hafa átt sér stað agabrot meðal leikmanna liðsins. Það hefur verið tekið á því innan liðsins," sagði talsmaður skoska knattspyrnusambandsins við fjölmiðla nú í morgun.

Í dag greindi The Sun frá því að þeir Ferguson og McGregor, sem báðir voru í byrjunarliði Skota gegn Hollandi um helgina, hafi setið við drykkju á aðfaranótt sunnudags.

Burley gaf leikmönnum leyfi til að fá sér í glas á laugardagskvöldið en var sagður æfur þegar hann frétti daginn eftir að einhverjir leikmenn hafi gengið of langt í drykkjunni. Brottvikning Ferguson og McGregor úr liðinu er afleiðing af því.

The Sun heldur því enn fremur fram að Ferguson eigi ekki afturkvæmt í skoska landsliðið á meðan að Burley sé við stjórnvölinn.

Þar með er ljóst að Craig Burley verður í byrjunarliði Skota í kvöld. Það er óvíst hvort Burley ætlar að halda sér við 4-3-3 leikkerfið sitt í kvöld eða breyta í 4-4-2 og því óvíst hver komi inn í liðið í stað Ferguson.