Hollendingar fóru létt með Skota

Holland vann 3-0 sigur á Skotlandi í undankeppni HM 2010 í kvöld en liðin leika í riðli Íslands.

Þetta var eini leikur riðilsins í dag en Skotar mæta Íslendingum í Glasgow á miðvikudagskvöldið.

Þar með eru Hollendingar með átta stiga forystu á bæði Skotland og Ísland sem koma næst með fjögur stig. Öll lið hafa leikið fjóra leiki til þessa.

Makedónía er með þrjú stig og Noregur með tvö stig en bæði lið hafa leikið þrjá leiki til þessa.

Klaas-Jan Huntelaar og Robin van Persie skoruðu mörk Hollendinga í fyrri hálfleik og Dirk Kuyt það þriðja úr víti á 77. mínútu. Christophe Berra braut þá á Huntelaar.

Skotar skoruðu reyndar mark í stöðunni 2-0 en það var dæmt af þar sem dómarinn taldi að Gary Teale, sóknarmaður Skota, hafi brotið á hollenska markverðinum.

Það var mikið um meiðsli í herbúðum Skota í dag en góðu fréttirnar eru þær að Barry Ferguson landsliðsfyrirliði lék allan leikinn. Varnarmaðurinn Alan Hutton kom inn á sem varamaður í leiknum og má búast við því að hann verði í vörn skoska liðsins gegn Íslandi á miðvikudaginn.