Þunglyndur yfir fréttunum

Pétur Magnússon býr í Kolding í Danmörku og hefur aldrei haft eins há laun í íslenskum krónum talið. Hann á erfitt með að átta sig á ástandinu á Íslandi og gat ómögulega útskýrt það fyrir tyrkneskættuðum leigubílstjóra á dögunum.

Einn þeirra tæplega tíu þúsund Íslendinga sem búa í Danmörku er Pétur Magnússon. „Ég fékk áfall þegar ég ætlaði að kaupa mér poka af uppáhaldsnamminu mínu, Djúpum, og sá verðið," segir Pétur sem er búinn að vera í fríi á Íslandi um jólin. „Ég fékk reyndar líka áfall þegar ég sá verðið um þarsíðustu jól!"

Pétur starfar í þjónustufyrirtæki í byggingargeiranum í bænum Kolding. Hann fylgdist vel með bankahruninu í haust. „Íslenskur vinnufélagi minn sagði að það væri allt að verða vitlaust á Íslandi. Vefur Ekstrablaðsins virtist áfjáður í að bera mjög slæmar fréttir af Íslandi en þar sem mér hefur fundist þeir neikvæðir í garð Íslands hringdi ég í mömmu. Hún vissi svo sem ekki mikið meira en ég en var mjög svartsýn. Svo lágum við yfir fréttunum á netinu í hverju hádegi, en fyrir rest hætti maður að nenna því. Maður varð engu nær og varð bara þunglyndur."

Pétur hefur heyrt af fjölmörgum íslenskum námsmönnum sem voru nánast í taugaáfalli þegar þeir horfðu upp á námslánin sín gufa upp í gengishruni íslensku krónunnar. „Það er fullt af fólki sem lifir nánast á núðlum. Sjálfum krossbrá mér þegar ég reiknaði kaupið mitt yfir í íslenskar krónur. Ég hef aldrei haft svona gott tímakaup áður, í íslenskum krónum talið, það er að segja. Ég sé litla ástæðu til að koma heim."

En hafa Íslendingar í einhver hús að venda í Danmörku?

„Ég hafði verið atvinnulaus um hríð en var sem betur fer kominn með vinnu áður en kreppan skall á. Það var ekki hlaupið að því að fá vinnu," segir Pétur. „Mín upplifun er sú að Danir hafi verið góðir við Íslendinga og vorkenni þeim mikið. Ég fékk mér far með tyrkneskættuðum leigubílstjóra um daginn. Hann var mjög fróður um Ísland og taldi upp alls konar staðreyndir. Hann lagði fyrir mig spurningu: Þið hafið fullt af fiski í sjónum, eigið fullt af náttúruauðlindum, eruð með tækniþekkingu og iðnað og eruð ekki nema 320.000 manns á landi sem er þrisvar sinnum stærra en Danmörk.

Hvers vegna í ósköpunum getið þið ekki bara öll haft það gott þarna? Ég gat náttúrlega engu svarað manninum. Tautaði bara eitthvað um að vonandi yrði einhver dreginn til ábyrgðar."

drgunni@frettabladid.is