Maradona: Öll sex mörk Bólivíu voru eins og hnífur í hjartað

Diego Maradona, þjálfari Argentínu, vaknaði upp við vondan draum í nótt þegar Argentína tapaði 1-6 á móti Bólivíu í Suður-Ameríku riðlinum í undankeppni HM. Þetta er versta tap Argentínumanna í sögunni og það kemur aðeins í öðrum alvöruleiknum undir stjórn Diego Maradona.

Leikurinn fór fram í mikilli hæð yfir sjávarmáli en Maradona vildi þó ekki kenna því um hvernig fór.

„Þunna loftið var ekki ástæðan. Við lentum á móti liði sem var betra. Þeir sýndu okkur allt sitt og spiluðu góðan fótbolta," sagði Maradona og fékk klapp að launum frá fjölmiðlamönnum á blaðamannfundinum.

„Hvaða lið sem hefði mætt Bólivíumönnum í þessum ham hefði lent illa í því eins og við. Ég kvaldist með mínum leikmönnum og öll sex mörk Bólivíu voru eins og hnífur í hjartað," sagði Maradona.

Bolivía komst yfir á 12. mínútu en Argentína jafnaði leikinn á 25. mínútu þegar Luis Gonzalez skoraði. Bólivía komst í 3-1 fyrir hálfleik og var komið í 5-1 eftir 66 mínútur. Tvö síðustu mörk liðsins komu eftir að Argentína hafði misst mann útaf með rautt spjald.

Joaquin Botero skoraði þrennu fyrir Bólivíu en hann leikur með liði Correcaminos í Mexíkó. Hin mörk liðsins skoruðu Marcelo Martins, Alex Da Rosa og Didi Torrico