Burley bálreiður dómaranum

George Burley, landsliðsþjálfari Skota, er allt annað en ánægður með frammistöðu dómarans Laurent Duhamel í leiknum gegn Hollandi í gær.

Í stöðunni 2-0 skoraði Gary Caldwell mark fyrir Skota en Duhamel dæmdi það ólöglegt. Burley vildi einnig meina að annað mark Hollendinga hafi komið eftir að brotið hafi verið á sínum manni.

„Hann tók eina eða tvær ákvarðanir sem voru okkur óhagstæðar," sagði Burley eftir leikinn.

Hann sagði að Dirk Kuyt hafi hindrað Allan McGregor markvörð Skota þegar að Robin van Persie skoraði annað mark Hollendinga með skalla eftir horn.

„Svo skoruðum við fullkomnlega löglegt mark og enginn skilur á hvað dómarinn var að dæma þegar hann dæmdi aukspyrnuna," sagði Burley.

„Þetta var afar slæm ákvörðun. Ef markið hefði verið dæmt gilt hefði staðan í leiknum verið 2-1 og ómögulegt að vita hvað hefði gerst þá."

Hann viðurkenndi þó að Hollendingar hafi verið betri aðilinn í leiknum og átt skilið að vinna.

Burley sagði að það væri gríðarlega mikilvægur leikur framundan gegn Íslandi á miðvikudagskvöldið. Leikurinn fer fram í Glasgow.

„Við verðum að vinna heimaleikina okkar ef við ætlum okkur að komast í umspilið," sagði Burley. „Þetta verður gríðarlega mikilvægur leikur eins og alltaf var vitað."

Skotland á eftir að mæta Íslandi, Makedóníu og Hollandi á heimavelli og svo Noregi á útivelli.

„Ef við vinnum okkar heimaleiki og náum í að minnsta kosti eitt stig í Noregi tel ég að það verði nóg til að ná öðru sætinu í riðlinum."