Eiður: Eðlilegt að vera svekktur

„Auðvitað er eðlilegt að vera svekktur eftir svona leik," sagði Eiður Smári Guðjohnsen eftir að Ísland tapaði fyrir Skotlandi í kvöld, 2-1.

Hann sagði það ljóst að Ísland átti meira skilið úr leiknum en að tapa honum.

„Sérstaklega miðað við spilamennsku okkar síðustu 20-25 mínúturnar áttum við að fá meira úr þessum leik."

Spurður hvort liðið hefði átt að byrja að sækja fyrr í leiknum en þeir gerðu sagði hann að stundum væri erfitt að stjórna gangi leiksins.

„Það er bara ekki alltaf hægt að spila eftir pöntun. Leikurinn þróaðist eins og hann gerði."

„Þetta gekk þó betur eftir að ég byrjaði að færa mig aftar á völlinn og fá boltann í lappirnar þar. Það hafði gengið illa að finna mig framar á vellinum. En þegar ég byrjaði að fá boltann á eigin vallarhelmingi fórum við að skapa fleiri færi og það færðist meiri ró yfir spilið okkar. Miðað við færin sem við fengum hefðum við átt að jafna."

Hann sagði það alveg ljóst að Ísland átti góðan möguleika að ná betri úrslitum gegn Skotum en raunin varð.

„Við sögðum það fyrir leik að við ættum góðan séns og við sýndum það svo í kvöld. Þess vegna erum við svona svekktir nú. Fólk sá að liðið hékk á þurrum þræði undir lokin."